140x140

NÝGGJ JÁTTAN TIL FRAMBURÐ OG MENNING Á LANDBÚNAÐARØKINUM

Hervið verður lýst eftir verkætlanum, sum kunnu skapa menning og framburð á landbúnaðarøkinum.

Í fíggjarlógini fyri 2022 er ein millión játtað til menningarætlanir. ”Landsstýrið hevur sett sær fyri at slóða fyri menning á landbúnaðarøkinum, og tí er av álvara neyðugt við nýggjum tankum og djørvum verkætlanum”, sigur Magnus Rasmussen, landsstýrismaður.

”Vit kunnu betra skipanirnar, sum skulu vaksa um verandi framleiðslu, men vit mugu fyrst og fremst eggja til nýskapan í landbúnaðinum, og vit eru sera spent at síggja, hvørjar verkætlanir farið verður undir”, sigur Magnus Rasmussen.

Í reglugerðini fyri játtanini stendur m.a., at verkætlanirnar, sum verða stuðlaðar av nýggju játtanina til framburð og menning á landbúnaðarøkinum, skulu fremjast í samstarvi við Búnaðarstovuna. Búnaðarstovan skal tryggja, at úrslitini gerast atkomilig hjá almenninginum og tøk hjá øðrum at brúka. Játtanin kann eitt nú verða nýtt til kanningar, skjalfesting og til praktiskar royndir.

Hervið verður lýst eftir umsóknum til verkætlanir til menning og framburð á landbúnaðarøkinum. Umsóknirnar kunnu sendast sum teldupostur til bst@bst.fo ella latast skrivstovuni á pappíri. Umsóknirnar skulu vera Búnaðarstovuni í hendi í síðsta lagi mánadagin, hin 6. juni 2022.

Sí reglugerðina fyri játtanina til verkætlanir fyri framburð og menning á landbúnaðarøkinum her.

« Aftur

Búnaðarstovan · Frammi í Dal 166 · FO-410 Kollafjørður · Føroyar · Tel. (+298) 479 000 · Fax (+298) 479 020 · bst@bst.fo
EAN nr.: 5797100000522 · V-tal: 403369